شاهد عيان حلب | صيدلي؟ لا تفكر تجي عتركيا صيدلي؟ لا تفكر تجي عتركيا || شاهد عيان حلب

صيدلي؟ لا تفكر تجي عتركيا

بالعامي احكيلنا

صيدلي؟ لا تفكر تجي عتركيا

أنا صيدلي من حلب، تركت البلد متل كل هالحلبية من شي سنة ونص، لأنه الوضع كارثي ولا يحتمل، وأنا عندي عيلة وأطفال.

وقت طلعت، الكل باسطنبول صورلي الشغل فيها متل الكذب، وعملّي البحر طحينة.

ولما وصلت تفاجأت بعكس هالحكي تمامًا، فأول شي بالنسبة لكونك صيدلي، ممنوع بتركيا تعدل شهادتك...مغضوب عليك يعني إنت والأطباء!

الشي المتوفر إلك كصيدلي هو شوية مراكز طبية سورية فاتحة هون وهون، وسكرت الوزارة نسبة كبيرة منها بآخر فترة، والبقيان منها موظفين صيادلة وخالصين، يعني خيارات جدًا محدودة.

فما قدامك إلا تفوت عالصيدليات التركية بمناطق السوريين، وتسألهن يوظفوك عندهم "أجير"، على أساس لغتك العربي بتفيد، فبتصير مترجم مو صيدلي بواقع الأمر. وحتى مع هيك، ما بيرضوا فيك، وبينظرولك نظرة المسكين.

شوية المصاري اللي مصمدهم بحلب حطيتهم بمشروع استثماري هون بتركيا، متل ما نسبة كبيرة من هالبشر عاملين، على أساس هون بلد الاستثمارات والتجارة، لكن للأسف ومع تراجع العملة التركية الرهيب خلال هالسنة، والأحداث الأمنية التانية اللي صارت، خلتنا نخسر كتير، وهالمشاريع كتير منها وقف.

أنا حاليًا بلا شغل، والمدخرات عم تروح، وشي بيوعدونا يعطونا إذن عمل، وشي بيوعدونا بجنسيات.

إذا طالع هلأ من حلب، فكر مليون مرة قبل ما تجي عهالبلد، وادرس الوضع منيح، وإياك ثم إياك تسمع لجماعة البحر طحينة...لأنو ماخرب بيتنا غيرن!