شاهد عيان حلب | شاب سوري يروي مراحل حصوله على الجنسية التركية شاب سوري يروي مراحل حصوله على الجنسية التركية || شاهد عيان حلب

شاب سوري يروي مراحل حصوله على الجنسية التركية

بالعامي احكيلنا

شاب سوري يروي مراحل حصوله على الجنسية التركية

أنا شاب سوري صيدلي، مقيم باسطنبول مع أهلي من حوالي أربع سنين ونصف، وحصلت عالجنسية التركية الخميس 10 آب، علمًا أني أحمل الكيملك طوال السنوات الماضية.

البداية كانت باتصال من موظف عربي، في تشرين التاني عام 2016، طلب مني الحضور لمبنى الهجرة التركية باسطنبول، وكنا وقتها سمعانين أنه تم فتح الباب لتجنيس السوريين، وكنت مسجل أني صيدلي في موقع الأكاديميين السوريين بتركيا قبل ما يتم إغلاق التسجيل فيه.

توجهت إلى المبنى ووصلت للموظف، وقالي أنه الموضوع هو للتقديم للجنسية، وطلب مني مجموعة أوراق، طبعًا بتختلف من مدينة لتانية، وعطاني موعد بعد أسبوع.

الأوراق المطلوبة كانت "الشهادة الجامعية مترجمة ومنوترة، الهوية السورية مترجمة ومنوترة، شهادة السواقة مترجمة (إن وجدت)، 4 صور شخصية لكل فرد من العائلة، صورة عن الكيملك لكل أفراد العائلة أو الإقامة لأصحاب إقامة العمل، دفتر العائلة مترجم ومنوتر، لاحكم عليه تركي من العدلية للزوجين والأولاد فوق 18 سنة، جواز السفر مترجم ومنوتر، إلى جانب ورقة قيد نفوس وعقد أجار البيت".

رحت على موعدي بعد أسبوع، في الغرفة 7 بمبنى الهجرة التركية، وكان في تقريبًا 30 شخص متواجدين عم ينتظروا دورهم كمان، بعدها باشروا الموظفين استلام الأوراق منا، وعطونا رقم الطلب الخاص فينا، وقالولنا ننتظر منهم اتصال لتحديد المقابلة، اللي لازم يحضرها الشخص مع زوجته وأولاده تحت 18 سنة، مع دفع وصل 10 ليرات تركية.

وبالفعل اتصلوا بعد شهرين وحددولنا المقابلة، وجمعونا بالأول بصالة كبيرة، وتأكدوا أنه أوراقنا كاملة، بعدها أخدونا للطابق الأول ودخلنا كل واحد لحاله، وسألونا عدة أسئلة متل عرّف عن نفسك، مخططاتك، شو ناوي تعمل بعد الجنسية هل بدك ترجع لسوريا ولا تسافر لأوربا، وغيرها، وأنا جاوبتهم بالتركي لأنه لغتي منيحة.

انتظرنا كم شهر لحين انتهاء الاستفاء على الدستور التركي، ولقيت موقع أقدر أتابع فيه ملفي، وكانت توصل الرسائل إليه تباعًا، الرسالة الرابعة مثلًا كانت إعلان عن انتهاء الموافقة الأمنية، وآخر رسالة كانت السابعة، اللي أعلمتني بحصولي على الجنسية، وأنه يجب حضوري للنفوس العامة بمدينتي ومن ثم الفرعية، و دفع 16 ليرة مع صور بيومترية .

سمعت أنه ببعض المدن الأخرى متل غازي عنتاب، كانت تجيهم رسائل بدال الاتصال، وعملوا مقابلة ثانية مع الوالي، وبعضهم إجتهم الشرطة عالبيت لتتأكد من العنوان.

حاليًا حصلت على ورقة تمثل الهوية التركية، وقالولي لازم أنتظر من أسبوع لـ 3 أسابيع، حتى توصلني الهوية التركية النظامية، وفي كتير سوريين متلي ومن كذا محافظة، أخدوا الجنسية التركية خلال الأيام الماضية.